Liselotte Greife

Siet köttens is Korl Mitglied in enen Utschuß. „Du büst jo Buurn ween“, hebbt se em all seggt, un : „Du büst dor jüst de richtige Mann för.“

Do is he denn ok inverstohn ween. Worüm ok nich? Tiet hett he, ünner Lüüd mag he ok geern ween. Dorüm hett he sik vör `n poor Johrn ok in ene Partei rinsnacken loten. Een Macker ut de Schooltiet hett em mol to ene Versammlung mitnomen. Hett em dor goot gefalln, un dat gefallt em ok nu noch. He kriggt jümmer mol wat Nee`s to weten, kann över düt un dat so`n beten mitsnacken un achterno mit de annern bi Beer un Klönsnack tohoopsitten.

Glieks bi de eerste Tosamenkunft von den nee`n Utschuß geiht dat dorüm, dat een Vörstand wählt warrn mutt. Un denn noch een Vörstandsvertreter un ok noch een Birot. De Wohl treckt sik so bit halvig teihn hen, un denn goht se no Huus.

Bi de tweete Sitzung geiht dat üm dat Lokol, nem se in de tokomen Tiet in tohoopkomen wöllt. De Sook is nich eenfach. Twee von de Weertslüüd sünd ok in ene Partei, un se wöllt af un an mol `n beten ünnerstützt warrn. Toletzt ward se sik eenig – half Johr bi den enen un half Johr bi den annern Weert.

Denn mutt noch een Wekendag för de Tosomenkunft utmookt warrn. Dat bruukt ok siene Tiet. Een von den Utschuß is in enen Gesangvereen un hett mondaags Proov. Twee sünd an elkenen Middeweken bi`n Kegeln, un een annern hett dünnersdaags sienen Skotovend. Freedaags is al Wekenenn un de Krimi in`n Kiekschapp. Blifft de Dingsdag. Un so ward se sik denn ok eenig – jümmer den tweeten Dingsdag in`n Mond schall de Sitzung ween.

Över dat Diskereern üm düsse wichtige Sook is de tweete Ovend ok hengohn. So bi Klock teihn rüm is Korl weller in`n Huus. Sien Ella hett al op em töövt. Se will nu weten, in wat för enen Utschuß he denn egens is, un wat se dor beschicken mööt.

Jungedi – do kummt Korl in de Kniep. Dat – weet he jo ok nich. Se hebbt do doch bit nu noch gor nich över snacken kunnt. Man – schall he dat Ella so seggen? To`n Glück kummt em rechttietig een plitschen Infall. He seggt eerstmol: „Do dröff ik nich över snacken, dat is geheem.“

Geheem, wat is dat för een Zauberwoort! Ella seggt em dat no, köst dat Woort so richtig ut. Geheem un ehr Korl is dor mit bi.

Over den annern Dag verleert sik de Respekteerlichkeit för düt Woort so no un no. Un nu meent Korl siene Fro, dat müß doch mit den Düvel togohn, wenn se achter dat geheem nicht achterkomen kunn. Se froogt denn ok nochmol no – toeerst vörsichtig, un denn jümmer mol `n beten wat resoluter. Toletzt ward Korl dat toveel un he gnaddert: “ Nu loot mi doch tominnst eerst nochmol hengohn un wat mihr to weten kriegen. Ik will di dat denn jo ok richtig verklookfideln.“

Do gifft Ella Rauh. Se weet woll, dat se töven mutt, wenn se nich allns verdarven will. Un Korl weet, dat he bi de neegste Sitzung nipp un nau oppassen un allns goot mitkriegen mutt. Man – bi de neegste Sitzung is do so`n Klooksnacker ut de Stadt mit `n Vördraag togangen. Geiht üm Stüern. Over de Keerl snackt twee lang un twee breet. He snackt hoochdüütsch, weet `n poor utländsche Wöör butenkopps to seggen un mengeleeert mol wat op Plattdüütsch dortwüschen. Dat höört sik bi em over ok ganz frömd an.

Korl hett ganzen Nomoddag in sienen Goorn rümwöhlt, un dat duurt nich lang – do dusselt he in. As he weller opwaken deit, is de Redner jüst bi de letzten Wöör: „……das geht gegen die Legalität“, seggt he. Un nochmol ganz düütlich: „Gegen die Legalität!“ Denn is he mit sienen Vördrag to Enn. `n poor Lüüd klatscht in de Hannen, un de Sitzung is ut.-

Do is Korl jo to sienen Glück noch rechttietig opwookt. He weet nu Bescheed un kann siene Ella dat in`n Huus richtig verkloorn. „Wi mookt enen Utschuß gegen dat Leege“ , seggt he. In de Stadt nöömt se dat Leg …Legalität.“

Süh – un nu versteiht Ella ok, worüm sowat geheem blieven mutt.