„Lust op Platt? – Man to!“ – Tweete Dagfahrt in Bad Beers

„Lust op Platt? – Man to!“ weer dat Motto vun de tweete Dagfahrt in Bad Beers, de dör den Landschapsverband Staad mööglich maakt worrn is. An 13. März hebbt sik rund um 30 Schoolmestersche und Schoolmester in dat evangelische Bildungszentrum in Beers to´n Plattlehren dropen. Jedeen Deelnehmer hett in Vorfeld de Möglichkeit harrt, sik en vun dree kreative Warkköppel uttosöken – mit en Schrievwarksteer, Kunst op Platt bi´t to en Rundreis dör de Welt vun de lütte Uul „Okke“ is dor för jedeen wat dorbi ween. Bevör dat mit de Warkköppel losgahn hett, hett de Organisatorin vun de Dagfahrt, Birgit Lemmermann, all Deelnehmers op den Dag instimmt. Mit lütte Opgaven in en Schnack-Karrussell kunnen sik de Deelnehmers kennen lehren un sik över jüm ehren Stand in de Scholen uttuschen. Achterran güng dat mit de Warkköppels los. In den ersten Warkkoppel hett Wilfried Zils verkloort, dat „Schrieven up Platt – gaar neet so swaar!“ is. Sien Warköppel leep – as de annerns ok – over dree Stünnen un schall de Deelnehmers „Lust up Platt“ maken. Acht Froonslüüd un twee Keerls sünd kamen – un glücklich na Huus föhrt, mit en Barg vull ne´e Ideen in den Kopp un sülvst schreven Texten.Keen aver sik leever anners kreativ utdrücken wull, de weer in de Kunstwarksteer vun Birgit Lemmermann good ophoben. De tweete Warkkoppel stünn ünner dat Motto „Dit is mien Land“. Wor is mien Lann, wor föhl ik mi Tohuus? Över lütte Experimenten, de helpen doot, dat man sik en Bild vun de Landschap um en rum maken kunn, sünd wunnerbare Kunstwarke rutkamen. All de, de nicht Schrieven un malen wüllt, hebbt sik op en Reis begeben. In den drütten Warkkoppel hett Nele Ohlsen de Deelnehmer mitnahmen in de Welt vun „Okke“. Runn um de lütte Uul hett sik de Schoolmestersche un Autorin Nele Ohlsen bannig veel Material förn Unnerricht utdacht, dat se in ehr Warkkoppel vörstellt hett.

Diese Seite drucken